Home » Interview » 

By Salai Gei on January 3, 2018. No Comments

မေးမြန်းသူ – Salai Hung Tun Gei

မေး။    ။ လွှတ်တော်က အစိုးရလုပ်ငန်းတွေမှာ စွက်ဖက်မှုတွေရှိနေတယ်လို့ ဝေဖန်သံတွေထွက်တဲ့အပေါ် ဘယ်လိုပြောချင်ပါလဲ။

ဖြေ။ ။ ကျွန်တော်တို့လွှတ်တော်ရေးရာ ဆောင်ရွက်တဲ့ကိစ္စတွေမှာ အစိုးရရဲ့လုပ်ငန်းတွေကို ၀င်စွက်ဖက်ခွင့်တော့မရှိပါဘူး။ သို့ပေမယ့် လွှတ်တော်ကိုယ်စားလှယ်များမှာ သူ့ဥပဒေနဲ့သူရှိပြီးသား။ အုပ်ချုပ်ရေးကိစ္စမျာလည်း တိုင်စာကော်မတီစတဲ့ ရေးရာကော်မတီ ၇ ခုဖွဲ့ထားတယ်။ အဲဒီကော်မတီမှာလည်း ဥပဒေပုဒ်မ ၂၅၁ အရဆိုရင် လွှတ်တော်က အခါအားလျော်စွာချမှတ်သည့် အုပ်ချုပ်ရေးဆိုင်ရာဆုံးဖြတ်ချက်များကို ပြည်နယ်အစိုးရက အကောင်အထည်ဖော်ရမယ်လို့ပြထားပြီးသား။ ဒါကြောင့် အုပ်ချုပ်ရေးဆိုင်ရာ ကိစ္စတွေကို လွှတ်တော်က ဆုံးဖြတ်တာလည်းရှိတယ်။ ဥပမာ တိုင်စာနဲ့ အသနားခံကော်မတီတို့လိုမျိုးလည်းပေါ့။ နောက်တစ်ပိုင်းက အစိုးရအနေနဲ့ လွှတ်တော်ကိုယ်စားလှယ်တွေကို တာဝန်ပေးတာရှိတယ်။ ဥပမာ ကျွန်တော်တို့က အစိုးရဖက်ကို စစ်ကိုင်းတိုင်းနဲ့ မကွေးတိုင်းနယ်နိမိတ်ကိစ္စတွေပြန်လည်စိစစ်ပါလို့ တိုက်တွန်းတာတွေရှိတယ်။ အစိုးရအဖွဲ့တွေက အဲဒီအတွက် လွှတ်တော်ကိုယ်စားလှယ်တွေကို အဖွဲ့ဝင်တွေအနေနဲ့ပြန်ထည့်ထားတာရှိတယ်။ အဲလိုမျိုးရှိတော့ လွှတ်တော်ကိုယ်စားလှယ်များဟာလည်း အစိုးရက တာဝန်ပေးတဲ့ကော်မတီများမှာပါတယ်။ ဥပမာ ကျွန်တော်ဆိုရင် သိမ်းဆည်းခံလယ်မြေများ ပြန်လည်စိစစ်ရေးကော်မတီမှာဆိုရင် မင်းတပ်ခရိုင်မှာ ကျွန်တော်တာဝန်ပေးတာခံရတယ်။ စည်ပင်ဈေးကိစ္စမှာဆိုရင် ကျွန်တော့်ကို နာယကကိစ္စမှာထားတယ်။ ဒုသမ္မတလာတုန်းကဆိုရင် ၀ိဇာသိပ္ပံကောလိပ်၊ နည်းပညာကောလိပ်၊ ပညာရေးကော လိပ်ဆိုပြီး တောင်းတာရှိတယ်။ အဲဒီမှာလည်း မြေအမြန်ရရှိရေးအတွက် ကျွန်တော့်ကိုတာဝန် ပေးတာတွေရှိတယ်။ အဲလိုမျိုးကိစ္စမှာလည်း ကျွန်တော်တို့ပူးပေါင်းဆောင်ရွက်ရတယ်။ ၀င်စွက်တာမဟုတ်ပဲ သူတို့အလုပ်ကို မြို့နယ်ကိုယ်စားလှယ်အနေနဲ့ ကူညီတာဖြစ်တယ်။ အဲဒါမျိုးကို ၀င်စွက်ဖက်တယ်လို့ ပြောတာမျိုးရှိကောင်းရှိမယ်။ ဒါပေမယ့် အစိုးရအဖွဲ့ကိုယ်တိုင် ၀င်စွက်ဖက်တယ်လို့မမြင်ပါဘူး။

မေး။    ။ ဘာဖြစ်လို့ အခုလိုစွက်ဖက်မှုတွေရှိနေတယ်ဆိုပြီး အသံတွေထွက်နေရတယ်လို့ထင်သလဲ။

ဖြေ ။    ။ တင်ဒါကိစ္စတွေမှာ လွှတ်တော်ကိုယ်စားလှယ်တွေအနေနဲ့ ဘယ်ကုမ္ပဏီကတော့ စံချိန်စံညွှန်းနဲ့မကိုက်တဲ့အတွက် နာမည်ပျက်စာရင်းမှာထည့်ပေးပါဆိုတာမျိုး တင်ပြတဲ့စာအများကြီးရှိတယ်။ ဒီဟာအများကြီးအပေါ်မူတည်ပြီးတော့ တင်ဒါတွေပေးတော့မယ်ဆိုရင်တော့ သက်ဆိုင်ရာမြို့နယ် ကိုယ်စားလှယ်တွေနဲ့ညှိနှိုင်းတာမျိုးကိုလုပ်သင့်ပါတယ်။ ဒါမျိုးကိုပြောတာကို ၀င်စွက်ဖက်တယ်လို့ ယူဆသလားပေါ့။

မေး ။   ။ အစိုးရအဖွဲ့ရဲ့ လုပ်ငန်းဆောင်ရွက်မှုတွေအပေါ်မှာကော ဘယ်လိုသုံးသပ်ချင်လဲ။

ဖြေ ။    ။ ကျွန်တော်တို့လွှတ်တော်ကနေ ဒေသန္တရစီမံကိန်းတွေမှာ အတည်ပြုပြီးသားတွေ အစိုးရက အကောင်အထည်ဖော်ရမှာ အားနည်းတယ်။ အားနည်းတော့ နိုင်ငံတော်ရဲ့ဘဏ္ဍာကို သုံးစွဲတဲ့နေရာမှာ ခိုင်ခံ့မှုမရှိအောင်၊ စံချိန်စံညွှန်းမရှိအောင် လုပ်တာတွေက ဘဏ္ဍာငွေလေလွင့်ပြုန်းတီးတာပေါ့။ ဥပမာ မုန်းချောင်းမှာဆိုရင် ပြီးခဲ့တဲ့နှစ်လောက်က တံတားသုံးစီးလုံးရေမှာပါသွားတယ်။ ဒီတံတားသုံးစီးလုံးရဲ့ တန်ကြေးကနည်းတာမဟုတ်ဘူး။ ဒီလိုဖြစ်သွားတယ်ဆိုတာ မူလကတည်းက စံချိန်စံညွှန်းမမီလို့ပေါ့။ တံတားအရှည်ရှိသင့်သလောက်မရှိတာမျိုး၊ အမြင့်ပေမြင့်သင့်သလောက်မမြင့်တာမျိုး အားနည်းတာက တစ်ချက်၊ နောက်တစ်ချက်က ကွန်ကရက်တံတားကြီးတွေ က တိုင်စိုက်ကတည်းက ချောင်ဘေးက သဲတွေကိုပဲသုံးပြီး လုပ်တာမျိုးဆိုတော့ အချိန်မတန်ပဲနဲ့ပျက်စီးသွားတယ်။ အဲဒါ နိုင်ငံတော်ရဲ့ငွေလေလွင့်တာ။ အဲလိုမျိုးတွေမှာ လွှတ်တော်ကိုယ်စားလှယ်တွေက ကွင်းဆင်းစစ်ဆေးတာတွေရှိတယ်။ အဲဒါက လွှတ်တော်ရဲ့အလုပ်ပဲ။ ကျွန်တော်တို့ဝင်စွက်ဖက်တာမဟုတ်ပါဘူး။ ကျွန်တော်တို့လည်း ဥပဒေကို ကိုင်ပြီးလုပ်ရတာပဲလေ။

မေး။    ။ အချို့ကိစ္စရပ်တွေမှာ အစိုးရအဖွဲ့နဲ့ ညှိနှိုင်းဆောင်ရွက်တဲ့အနေအထားမျိုးကောရှိလား။

ဖြေ။     ။ လွှတ်တော်ကိုလည်း အုပ်ချုပ်ရေးနဲ့ တရားစီရင်ရေးက စောင့်ကြည့်ထိန်းရမယ်။ လွှတ်တော်ကလည်း သူတို့ကိုလုပ်ရမယ်။ ဒါက ဒီမိုကရေစီရဲ့ သဘောတရားဖြစ်တယ်။ လုပ်တဲ့အချိန်မှာလည်း တည်ဆဲဥပဒေအတိုင်းလုပ်ရတာပေါ့။ အစိုးရအဖွဲ့အနေနဲ့ ဥပဒေဘောင်ကျော်ပြီးလုပ်သလား။ ရှိတဲ့ဥပဒေအပေါ် အခြေခံပြီးလုပ်တဲ့အချိန်မှာ အားနည်းနေသလားဆိုတာမျိုးပေါ့။ တာဝန်လစ်ဟင်းသလားပေါ့။ အဲဒီသုံးချက်ကို ကျွန်တော်တို့က သုံးသပ်ပြီးတော့ အားနည်းချက်တွေ့ရင်တော့ ညှိနှိုင်းဆောင်ရွက်ရမှာပေါ့။

မေး။    ။ ချင်းပြည်နယ်လွှတ်တော်ရဲ့ နှစ်နှစ်တာကာလအတွင်း သုံးသပ်ချက်ပြောပေးပါအုံး။

ဖြေ။     ။ လက်ရှိအနေနဲ့ အမှန်အတိုင်းသုံးသပ်မယ်ဆိုရင် လွှတ်တော်ကော၊ အစိုးရအဖွဲ့ကော အထိုက်လျောက်တော့ အားနည်းသေးတယ်။ အားမရသေးတဲ့အပိုင်းက ကျွန်တော်တို့လွှတ်တော်ဆိုရင် ပြီးခဲ့တဲ့ သုံးလေးလပိုင်းကမှ ကိုယ်ပိုင် ၀န်ထမ်းနဲ့လစာကိုပေးနိုင်တယ်။ ဒီနေ့အထိ ကိုးမြို့နယ်စလုံးက လာတဲ့လွှတ်တော်ကိုယ်စားလှယ်များကို နေရာထိုင်ခင်းကိုတောင်ကော်ငးကောင်းမပေးနိုင်ဘူး။ အစိုးရရိပ်သာမှတည်းခိုင်းတယ်။ တစ်ခါတစ်လေကျရင် ဧည့်သည်များနေတော့ အပြင်မှာတည်းဖို့တောင် အခက်အခဲရှိတယ်။ ဒါကြောင့်မို့ လွှတ်တော်သီးခြားရုံးနဲ့ ရိပ်သာဆောက်တာကို အကောင်အထည်ဖော်နေပြီ။ နောက်တစ်ခုက ရေးရာကော်မတီ (၇) ခုမှာ ပြင်ပက ပညာရှင်များအပါအ၀င်ဖွဲ့ထားတယ်။ အဲဒီကော်မတီတွေက ကျွန်တော်တို့ပေးမယ့် မော်တော်ယဉ်တွေနဲ့ မြို့နယ်ကိုးမြို့နယ်လုံးကို သွားရမှာ။ ဒီလိုမော်တော်ယဉ်တွေ လုံလောက်မှုမရှိသေးဘူး။ တစ်နှစ်ပြီးတစ်နှစ် ဘတ်ဂျက်တွေရေးနေတာဆိုတော့ မကြာခင်မှာတော့ ရတော့မှာပါ။ ပြည့်စုံမှုတော့မရှိသေးဘူး။ ကိုးမြို့နယ်စလုံးမှာ ရေးရာကော်မတီတွေက ဆိုင်ရာတာဝန်တွေကို ထမ်းဆောင်လာနိုင်ရန် လွှတ်တော်အားကောင်းလာလိမ့်မယ်။ အဓိကလိုချင်တာကတော့ ဒေသအတွင်း အမှန်တကယ်လိုအပ်နေတာကဘာလဲ။ သဘာဝပတ်ဝန်းကျင်ထိမ်းသိမ်းရမယ်၊ သားရဲတိရိစ္ဆာန်ထိန်းသိမ်းရမယ့်ဟာတွေက ဘာတွေလဲ။ တကယ်ပဲ အစိုးရအဖွဲ့တွေ ပြောတဲ့နေရာမှာ လမ်း၊ တံတားတွေလိုအပ်နေတာလားဆိုတဲ့အချက်မျိုးအပြင် အစိုးရအဖွဲ့ဆောင်ရွက်တဲ့ ဒေသန္တာရဖွံ့ဖြိုးရေးလုပ်ငန်းရဲ့ အားနည်းမှု၊ အားသာမှု၊ ခိုင်ခံ့မှု တွေကိုပါအများကြီးစိစစ်ရမှာ။ လမ်းတံတားကိစ္စဆိုရင် ပြည်နယ်ဘတ်ဂျက်ရဲ့ ၅၀ ရာခိုင်နှုန်းကျော်သုံးစွဲတာကိုး။ အဲဒါကို ပြန်စိစစ်ရာမှာ အလွန်အားနည်းတယ်။ လွှတ်တော်အနေနဲ့ ကွင်းဆင်းဖို့အတွက် မော်တော်ယဉ်ပြည့်ပြည့်စုံစုံရလာပြီဆိုရင် သူတို့လုပ်ငန်းရဲ့ ဘတ်ဂျက်သုံးစွဲတွေကို ပြင်ပပညာရှင်တွေနဲ့ ပေါင်းပြီး အရည်အသွေးပြည့်မီမမီတွေကို ကြည့်လို့ရမယ်။

မေး။    ။ အစိုးရသစ်တက်လာပြီး ချင်းပြည်နယ်ရဲ့ ဖွံ့ဖြိုးရေးလုပ်ငန်းဆောင်ရွက်မှုအပေါ် သုံးသပ်ပေးပါ။

ဖြေ။     ။  ချင်းပြည်နယ်မှာ ကတ္တရာလမ်းဖောက်တယ်။ ဘယ်လမ်းမှ အခုထိ ကောင်းကောင်းသွားရတယ်လို့မရှိသေးဘူး။ နိုင်ငံတော်ငွေလည်း အများကြီးကုန်ပြီ။ မတူပီနဲ့ပလက်ဝ ဆိုရင် မိုင် ၁၇၃ မိုင်ရှိတယ်။ ၁၉၇၄ ကတည်းကဖွင့်ပြီးသား။ အဲဒါက ၂၀၁၇ ရောက်ပြီးတဲ့အထိ ဆယ်မိုင်ပြည့်အောင် ကတ္တရာလမ်းကမရှိဘူး။ ရွံ့တွေ၊ ဗွက်တွေ၊ ကမ်းပါးယံတွေနဲ့ သွားနေရတယ်။ အဲဒါကြောင့် ဒီပေါ်လစီကြီးကိုဘယ်လို ပြောင်းလဲမလဲပေါ့။ ဒါကြောင့် ကျွန်တော်တို့လွှတ်တော်ကိုယ်စားလှယ်တွေက ရေမြောင်းတွေကောင်းကောင်းလုပ်ပြီး ကွန်ကရက်လမ်းတွေခင်းရင်မကောင်းဘူးလားလို့ စဉ်းစားနေတယ်။ ကတ္တရာလမ်းက မိုးများရင်လည်းမဖြစ်ပြန်ဘူး။ အခုရခိုင်မှာဆိုရင် ကတ္တရာဖောက်ခဲ့တာတွေက အပေါက်ပေါက်တွေနဲ့ မကောင်းနိုင်ဘူး။ အခုကွန်ကရက်တွေခင်းလိုက်တော့ စိတ်ချမ်းချမ်းသာသာနဲ့သွားလို့ရပြီ။ မွန်ပြည်နယ်ဆိုရင်လည်း ကွန်ကရက်တွေချည်းခင်းတယ်။ လမ်းဦးစီးဌာနပိုင်ကလည်း မိုင်သုံးရာကျော်ပဲရှိတာကိုး။ ကျွန်တော်တို့လွှတ်တော်အနေနဲ့ ဒီလိုမူဝါဒတွေလည်း ပြင်ဆင်ပေးဖို့ရှိတယ်။ နောက်ကျွန်တော်တို့စဉ်းစားတာက ချင်းပြည်နယ်ကိုးမြို့နယ်လုံးမှာ ကျေးလက်ရုံးနဲ့ နတလကလမ်းဖောက်ပေးလိုက်တယ်။ ပြင်ဆင်ထိမ်းသိမ်းတာဘာမှမရှိဘူး။ လမ်းတော့ဖောက်ပြီးသွားပြီ ဆိုင်ကယ်တောင်သွားလို့မရဘူး။ မိုးတစ်ခါရွာတာနဲ့ တစ်ခါတည်းပျက်ရော။ နောက်မြို့တွင်းမှာဆိုရင်လည်း စည်ပင်ရေမြောင်းတွေပိတ်တယ်၊ ပြိုတယ်။ ဘတ်ဂျက်ပြန်တောင်းရင်လည်း တစ်နှစ်ကြာအုံးမယ်။ တစ်နှစ်ကြာတောင် ရဖို့မသေချာဘူး။ ဒီပြသနာနဲ့ပတ်သက်ပြီး မကွေးတိုင်းကဘာလုပ်သလဲဆိုတော့ တင်ဒါပိုလျှံငွေနဲ့ စက်ကြီးတွေမြို့နယ်အလိုက် တစ်စုံစီဝယ်လိုက်တယ်။ စစ်ကိုင်းတိုင်းကောပဲ။ အဲဒါကို ထိမ်းသိမ်းဖို့ ဌာနတစ်ခုကိုအပ်တယ်။ ပြင်ဆင်စရိတ်လည်း ကာမိအောင် ဈေးသက်သက်သာသာနဲ့ လွှတ်တော်ကိုယ်စားလှယ်တွေထောက်ခံချက်နဲ့ငှားလို့ရအောင် လုပ်တယ်။ ကျွန်တော်တို့ချင်းပြည်နယ် မှာလည်း တင်ဒါပိုလျှံငွေကနေ အဲလိုလုပ်လို့ရအောင် တိုက်တွန်းဖို့အစီအစဉ်ရှိတယ်။ ဒေသန္တရစီမံကိန်း လုပ်ဆောင်တဲ့နေရာမှာလည်း ဘာတွေအားနည်းသလဲ၊ အားသာသလဲဆိုတာကိုလည်း လွှတ်တော်က အမြဲသုံးသပ်နေမှာပဲ။ သုံးသပ်ပြီးတော့ ကျွန်တော်တို့ တိုက်တွန်းမှုမျိုး၊ ဥပဒေပြုပေးမှုတွေကို ရှေ့ဆက်ပြီး ဆောင်ရွက်ပေးသွားမယ်။ နိုင်ငံတော်ဘတ်ဂျက် သုံးစွဲတဲ့နေရာမှာ ဟာကွက်အများကြီးရှိတဲ့အတွက်ကြောင့် ထိထိရောက်ရောက်ပိုဖြစ်နိုင်ဖို့အတွက် ကျွန်တော်တို့အများကြီးစဉ်းစားထားပါတယ်။ အစိုးရကိုလည်း ကျွန်တော်တို့အပြစ်ရှာဖို့မဟုတ်ပါဘူး။ ထိထိရောက်ရောက် ပိုလုပ်ဆောင်နိုင်အောင် ကျွန်တော်တို့က ဆောင်ရွက်ပေးမှာပါ။

မေး။    ။ လွှတ်တော်ကိုယ်စားလှယ်တွေကို ဒေသန္တရဖွံ့ဖြိုးရေးလုပ်ငန်းဆောင်ရွက်ရာမှာ အလေးထား တိုင်ပင်ရမယ့်ပုဂ္ဂိုလ်များလို့ ဥပဒေမှာလည်း ပြဌာန်းထားတယ်။ အဲဒီလို ကိစ္စတွေမှာကော အစိုးရအဖွဲ့အနေနဲ့ တိုင်ပင်တာမျိုးရှိလား။

ဖြေ။     ။ တင်ဒါခေါ်တဲ့ကိစ္စနဲ့ တင်ဒါချတဲ့ကိစ္စကိုတော့ အစိုးရအဖွဲ့ရဲ့တာဝန်ပဲ။ လွှတ်တော်ရဲ့ တာဝန်မဟုတ်ဘူး။ သို့သော်ငြားလည်းပဲ ကျွန်တော်တို့ပြောချင်တာက လွှတ်တော်ကို ဒီကော်မတီမှာ ထည့်ပါလို့ တစ်ကြိမ်မှမပြောပါဘူး။ လွှတ်တော်ဥပဒေထဲမှာ ပြဌာန်းထားတဲ့အတိုင်း အများကရွေ့းချယ်ပြီး အများကလေးစားတဲ့ ပုဂ္ဂိုလ်များဖြစ်တဲ့အတွက် အုပ်ချုပ်ရေးကိစ္စရပ်များ၊ ဒေသန္တာရဖွံ့ဖြိုးရေး လုပ်ငန်း ဆောင်ရွက်ရမယ့်ကိစ္စများမှာ အလေးထားတိုင်ပင်ထိုက်သည့်ပုဂ္ဂိုလ်များဟု မှတ်ယူရမယ်လို့ ဥပဒေက ပြောပြီးသားလေ။ ဒါကြောင့် ဘယ်ကော်မတီနဲ့ဘယ်လိုလုပ်ရင်ကောင်းမလဲဆိုတာမျိုးက အဲဒီမြို့နယ်ရဲ့ ကိုယ်စားလှယ်တွေက အသိဆုံးပဲလေ။ တိုင်ပင်ညှိနှိုင်းတဲ့အဆင့်မျိုးတော့ ဖြစ်သင့်တာပေါ့။ ကော်မတီ တွေထဲမှာ ထည့်ဖို့မလိုပါဘူး။ အဲလိုဆိုရင် ၀င်စွက်သလိုလည်းဖြစ်သွားမှာကိုး။ အချိန်လည်းရချင်မှရမှာ ။ ညှိနှိုင်းတိုင်ပင်တာမျိုးရှိရင်တော့ နိုင်ငံတော်အတွက် ပိုအကျိုးရှိမယ်လို့ယုံကြည်တယ်။ အရည်အသွေး မပြည့်မီတဲ့ ကုမ္ပဏီတွေကို အထပ်ထပ်ပေးနေရင် မကောင်းဘူးပေါ့။

မေး။    ။ တင်ဒါကိစ္စဆောင်ရွက်မှုတွေ အပေါ်မှတ်ချက်ပြုချင်တာရှိလား။

ဖြေ။     ။ တစ်ချို့ကုမ္ပဏီအကြီးကြီးတွေက ဒီဌာနလည်းသူပဲ။ ဟိုဌာနလည်းသူပဲဆိုတာမျိုးတွေ အများကြီး တွေ့နေရတယ်။ နောက်တစ်ခုက ဖွံ့ဖြိုးရေးလုပ်ငန်းဆောင်ရွက်တဲ့အချိန်မှာ ဒေသခံတွေရဲ့ စီးပွားရေးကို အနည်းအကျဉ်းတော့ အထောက်အကူပြုသင့်တယ်လို့ ကျွန်တော်တို့မြင်တယ်။ ရေမြောင်းလုပ်မယ်၊ တာချဲ့တာလုပ်မယ်၊ ကျောက်ခင်းတာလုပ်မယ်။ ဒါမျိုးတွေကို ဒေသခံတွေ အများကြီး လုပ်နိုင်တယ်။ တကယ့်နည်းပညာအဆင့်မြင့်လည်းမဟုတ်ဘူးလေ။ အဲဒါမျိုးကို ငွေရှင်ကြေးရှင် ကုမ္ပဏီတွေကိုပဲ သူတို့ခေါ် လိုက်တော့ ဒေသခံတွေမှာ တစ်ပြားတစ်ချပ်မှ ခံစားခွင့်မရှိဘူး။ အဲဒါတွေကိုလည်း ကျွန်တော်တို့အနေနဲ့တော့ မကြိုက်ဘူး။

ကျေးဇူးတင်ပါတယ်။

Latest Post

Leave a Reply

Your email address will not be published. Required fields are marked *