၂၁ရာစုပင်လုံ ဒုတိယအကြိမ်အစည်းအဝေးမတိုင်ခင် ချင်းအမျိုးသားအဆင့်နိုင်ငံရေးဆွေးနွေးပွဲ အလားအလာနည်း

Home » Chin News » ၂၁ရာစုပင်လုံ ဒုတိယအကြိမ်အစည်းအဝေးမတိုင်ခင် ချင်းအမျိုးသားအဆင့်နိုင်ငံရေးဆွေးနွေးပွဲ အလားအလာနည်း

By Admin on February 7, 2017. No Comments

၂၁ရာစုပင်လုံ ဒုတိယအကြိမ်အစည်းအဝေးမတိုင်ခင် ချင်းအမျိုးသားအဆင့်နိုင်ငံရေးဆွေးနွေးပွဲ အလားအလာနည်း
Mai Bawi Than Par
Chin World
February 07, 2017

ဖေဖော်ဝါရီလကုန်တွင် ကျင်းပရန် ရည်ရွယ်ထားသည့် ပြည်ထောင်စုငြိမ်းချမ်းရေးညီလာခံ (၂၁ ရာစုပင်လုံ) ဒုတိယအကြိမ်အစည်းအဝေးမတိုင်မီတွင် ချင်းအမျိုးသားအဆင့် နိုင်ငံရေးဆွေးနွေးပွဲဖြစ်ပေါ်လာနိုင်ရန် နည်းပါးသွားပြီဟု သိရသည်။

ချင်းအမျိုးသားအဆင့်နိုင်ငံရေးဆွေးနွေးပွဲအား ချင်းအမျိုးသားနေ့ပွဲတော်ကြီးအပြီးတွင် ဟားခါးမြို့၌ ကျင်းပရန်အတွက် ကနဦးပြင်ဆင်ထားခဲ့ကြခြင်းဖြစ်သည်။

ချင်းပြည်နယ်အစိုးရ၏ ပြောခွင့်ရပုဂိုလ် ဆလိုင်းအိုက်ဇက်ခင်မှ “ဒီချင်းအမျိုးသားအဆင့် နိုင်ငံရေးဆွေးနွေးပွဲလုပ်ဖို့အတွက် ဖွဲ့စည်းမှုနဲ့ပတ်သက်ပြီး ညွှန်ကြားချက် အခုထိ ရောက်မလာသေးပါဘူး။ ဒါမျိုးက နိုင်ငံတော် အတိုင်ပင်ခံရုံး (သို့) NRPC (National Reconciliation and Peace Center) ကနေ ဖွဲ့စည်းခွင့်စာရောက်လာဖို့လိုတယ်။ ဥပမာ- တနင်္သာရီနဲ့ ကရင်မှာလိုမျိုးမှာဆိုရင် နိုင်ငံတော်အတိုင်ပင်ခံကိုယ်တိုင် လက်မှတ်ထိုးပေးတယ်လေ။ လောလောဆယ်အထိ ကျနော်တို့မရသေးပါဘူး” ဟုဆိုသည်။
ချင်းအမျိုးသားတပ်ဦး (CNF) မှ ဒုဥက္ကဌ ဒေါက်တာဆလိုင်းလျန်မှူန်းဆာခေါင်းမှ “ကျနော်တို့လူမျိုးရဲ့အနာဂတ်အတွက် အသက်တမျှအရေးကြီးတဲ့အရာတွေကို ဆွေးနွေးမယ့် ပင်လုံညီလာခံကို ကိုယ့်လူမျိုးအချင်းချင်းကြားမှာ ဆွေးနွေးတိုင်ပင်မှုမရှိပဲ သွားတက်ပြီး ဘာတွေကို တင်ပြဆွေးနွေးရမှာလဲ။ အစိုးရဘက်က လုံခြုံရေးအကြောင်းပြပေမယ့် ချင်းပြည်နယ်မှာ CNF နဲ့ အစိုးရက တိုက်နေကြတာမှ မဟုတ်တာ။ အမျိုးသားအဆင့် တွေ့ဆုံဆွေးနွေးပွဲ မဖြစ်လာနိုင်ခဲ့ရင်တော့ ဒီ ၂၁ရာစုပင်လုံညီလာခံရဲ့ ဒုတိယအကြိမ်ဆွေးနွေးပွဲကို တက်သင့်/မသင့်ကို ပြန်စဉ်းစားရမှာ ဖြစ်ပါတယ်” ဟု Frontier Website တွင် ဖော်ပြထားသည်။
လက်ရှိတွင် အစိုးရမှ တရားဝင်ခွင့်ပြုချက်ဖြင့် အမျိုးသားအဆင့် နိုင်ငံရေးဆွေးနွေးပွဲ ကျင်းပလျက်ရှိသော နေရာ (၃) နေရာရှိပြီး၊ ယင်းတို့မှာ ကရင်ပြည်နယ်၊ တနင်္သာရီတိုင်းဒေသကြီးနှင့် နေပြည်တော်တို့ဖြစ်သည်။ သို့သော်လည်း ကချင်၊ ရှမ်း၊ ပအို့ဝ်တို့တွင် အမျိုးသားအဆင့်အကြိုနိုင်ငံရေးဆွေးနွေးပွဲများအား ဇန်န၀ါရီလနှင့် ဖေဖော်ဝါရီလများတွင် ကျင်းပခဲ့ကြသည်။
နိုင်ငံတော်သမ္မတရုံးမှ ပြောခွင့်ရပုဂိုလ် ဦးဇော်ဌေးမှ “ရခိုင်နဲ့ ချင်းကို အမျိုးသားအဆင့် နိုင်ငံရေးဆွေးနွေးပွဲလုပ်ခွင့်မပေးတဲ့သဘောမဟုတ်ပါဘူး။ ဒါပေမယ့် လက်ရှိမှာ လုံခြုံရေးနဲ့ နိုင်ငံရေးအခြေအနေအရ ဒီပင်လုံညီလာခံပြီးသွားမှပဲ အမျိုးသားအဆင့်နိုင်ငံရေးဆွေးနွေးပွဲ လုပ်ဖို့ ပိုသင့်တော်ပါတယ်။ CNF အနေနဲ့ ချင်းအားလုံးကို ကိုယ်စားပြုမှုမရှိပါဘူး။ ဆက်ဆံရေးရုံးဖွင့်ဖို့တောင်မှ ဒေသခံတွေက လက်မခံခဲ့ဘူး။ ကရင်မှာဆိုရင် နိုင်ငံရေးပါတီတွေ၊ လူမှု့အဖွဲ့အစည်းတွေက KNU အောက်မှာ ရှိတယ်။ ချင်းမှာက နိုင်ငံရေးနဲ့ လူမှု့အဖွဲ့အစည်းတွေက CNF အောက်မှာ ရှိမနေပါဘူး” ဟု 7 Day TV နှင့် တွေ့ဆုံစဉ်ပြောဆိုခဲ့သည်။
ဤကဲ့သို့သော အမျိုးသားအဆင့်နိုင်ငံရေးဆွေးနွေးမှုများတွင် ခေါင်းစဉ် (၅) ခုအား ချပေးထာပြီး ယင်းတို့မှာ- နိုင်ငံရေး၊ စီးပွားရေး၊ လူမှုရေး၊ လုံခြုံရေးနှင့် မြေယာနှင့် သဘာဝပတ်ဝန်းကျင်တို့ဖြစ်သည်။ ဤခေါင်းစဉ် (၅) ခုတွင် လုံခြုံရေးကိစ္စကိုမူ ပြည်ထောင်စုအဆင့်တွင် ဆွေးနွေးရန်မှလွဲ၍ ကျန်သည့်ခေါင်းစဉ်များအား မိမိတို့ သက်ဆိုင်ရာအမျိုးသားအဆင့်နိုင်ငံရေးဆွေးနွေးမှုများတွင် ဆွေးနွေးရန်အတွက် ချမှတ်ထားသည်ဟု သိရသည်။
၂၁ ရာစုပင်လုံညီလာခံ ပြည်ထောင်စုငြိမ်းချမ်းရေးညီလာခံနှင့် စပ်လျှဉ်း၍ ချင်းပြည်နယ်အစိုးရပြောခွင့်ရပုဂိုလ် ဆလိုင်းအိုက်ဇက်ခင်မှ ” ဒီညီလာခံကို ချင်းပြည်နယ်အစိုးရဘက်နဲ့ နိုင်ငံရေးပါတီဘက်က တက်ရမယ့်သူတွေကော၊ အစိုးရဘက်က nominate တဲ့သူတွေတော့ တက်ကြမှာပါ” ဟု ပြောသည်။
လွန်ခဲ့သည့် ၂၀၁၆ ခုနှစ် သြဂုတ်လကုန်တွင် ကျင်းပခဲ့သော ပြည်ထောင်စုငြိမ်းချမ်းရေးညီလာခံ (၂၁ ရာစုံပင်လုံ) ပထမအကြိမ်အစည်းအဝေးတွင် ချင်းအမျိုးသားများဘက်မှ ဒေါက်တာဆလိုင်းလျန်မှူန်းဆာခေါင်း (ချင်းအမျိုးသားတပ်ဦး)၊ Pu Chin Sian Thang (ဇိုမီးဒီမိုကရေစီအဖွဲ့ချုပ်) နှင့် ဆလိုင်းငိုင်ဆာ့ခ် (ချင်းဒီမိုကရေစီအဖွဲ့ချုပ်) တို့မှ (၁၀) မိနစ်စီ မိန့်ခွန်းပြောခွင့်ရခဲ့သည်။

Latest Post

Leave a Reply

Your email address will not be published. Required fields are marked *